საქართველოს ოთხ მუნიციპალიტეტში ჩატარებულ შუალედურ არჩევნებში „ქართული ოცნების“ კანდიდატებმა გაიმარჯვეს. არჩევნებზე სულ 1 136 ამომრჩეველი მივიდა.

კენჭისყრა ვანის, წალკის, დმანისისა და ახმეტის მუნიციპალიტეტებში, სულ შვიდ საარჩევნო უბანზე გაიმართა.

დმანისში, წალკასა და ვანში ერთმანეთს „ქართული ოცნებისა“ და „ძლიერი საქართველო - ლელოს“ კანდიდატები უპირისპირდებოდნენ, ხოლო ახმეტაში მხოლოდ ერთი კანდიდატი, „ქართული ოცნების“ წარმომადგენელი მონაწილეობდა.

შედეგები ოლქების მიხედვით ასე განაწილდა:

შუალედური არჩევნების ჩატარება საჭირო გახდა მას შემდეგ, რაც ოთხივე მუნიციპალიტეტში საკრებულოს მაჟორიტარ წევრებს უფლებამოსილება ვადამდე შეუწყდათ.

არჩევნების ორგანიზებისთვის სახელმწიფო ბიუჯეტიდან 1 117 000 ლარი გამოიყო. თანხა ცენტრალურ საარჩევნო კომისიას მთავრობის სარეზერვო ფონდიდან გადაეცა. შესაბამისად, შვიდ საარჩევნო უბანზე საშუალო ხარჯი დაახლოებით 159,6 ათასი ლარი იყო.

ცესკოს თავმჯდომარე გიორგი კალანდარიშვილმა განაცხადა, რომ არჩევნები „მშვიდ, უსაფრთხო და კონკურენტულ გარემოში“ ჩატარდა და ამომრჩევლებს საკუთარი არჩევანის თავისუფლად დაფიქსირების შესაძლებლობა ჰქონდათ.

შუალედური არჩევნები იმ ფონზე გაიმართა, როდესაც ოპოზიციური პარტიები, ადგილობრივი და საერთაშორისო უფლებადამცველი ორგანიზაციები და ევროკავშირი საქართველოში დემოკრატიულ უკუსვლაზე საუბრობენ.

ამავე დროს, 2026 წლის სექტემბერში „ქართულმა ოცნებამ“ საკონსტიტუციო სასამართლოს მიმართა სარჩელით, რომლითაც რამდენიმე ოპოზიციური პოლიტიკური პარტიის აკრძალვას ითხოვს.

სარჩელი ეხება „ერთიან ნაციონალურ მოძრაობას“, „კოალიციას ცვლილებისთვის“, „ძლიერ საქართველოს - ლელოს“, „ფედერალისტებს“ და პარტიას „გახარია საქართველოსთვის“.