რუსეთის თავდაცვის სამინისტრო აცხადებს, რომ ვოლოდიმირ ზელენსკის ბოლო განცხადებების საპასუხოდ, რუსეთის შეიარაღებული ძალები უკრაინის სამხედრო-სამრეწველო კომპლექსის ობიექტებზე დარტყმებს გააძლიერებენ. ინფორმაციას რუსული მედია ავრცელებს.
„უკრაინის მოსახლეობამ ამაში მხოლოდ კიევის რეჟიმის მეთაური უნდა დაადანაშაულოს“, - ნათქვამია რუსეთის თავდაცვის სამინისტროს განცხადებაში.
უწყების მტკიცებით, ზელენსკის „სამოქალაქო ობიექტებზე დარტყმის ბრძანების გაცემით სრული პირადი და პოლიტიკური პასუხისმგებლობა ეკისრება რუსეთის შეიარაღებული ძალების რეაგირებაზე“.
მანამდე უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა რუსულ ნავთობგადამამუშავებელ ქარხნებზე დარტყმებს გააძლიერებს. მისი თქმით, ეს იქნება პასუხი რუსეთის მიერ არჩეულ საჰაერო დარტყმების ახალ სტრატეგიაზე, რომლის მიზანიც მოსახლეობის იძულებაა, დატოვოს კიევი და სხვა ქალაქები.
Reuters-თან ინტერვიუში ზელენსკიმ ასევე განაცხადა, რომ უკრაინის სადაზვერვო სამსახურებმა მოიპოვეს დოკუმენტები, რომლებიც, მისი თქმით, ადასტურებს, რომ რუსეთის ლიდერმა ვლადიმირ პუტინმა ზამთრის წინ „ახალი დოქტრინის“ შესახებ ბრძანება გასცა.
ზელენსკის განცხადებით, აღნიშნული დოქტრინა სამოქალაქო დანიშნულების ობიექტების უფრო ფართო სპექტრზე სამხედრო დარტყმების განხორციელებას ითვალისწინებს.
უკრაინის პრეზიდენტმა აღნიშნა, რომ კიევი მოსკოვის ტაქტიკის ცვლილებას საპასუხო ქმედებებით უპასუხებს, თუმცა, მისი თქმით, უკრაინა სამოქალაქო ინფრასტრუქტურაზე დარტყმებს არ განახორციელებს.
