რუსთავის მე-17 პენიტენციურ დაწესებულებაში მსჯავრდადებული იაკობ გულედანი გარდაცვლილი იპოვეს. სპეციალური პენიტენციური სამსახური თვითმკვლელობის ვერსიაზე საუბრობს, თუმცა გარდაცვლილის ოჯახი ამ ვერსიას ეჭვქვეშ აყენებს.

ინფორმაცია იაკობ გულედანის გარდაცვალების შესახებ 4 ოქტომბერს „ტვ პირველმა“ გაავრცელა.

გარდაცვლილის მამიდის, ვალიდა გულედანის თქმით, ოჯახს მომხდარის შესახებ 2 ოქტომბერს შეატყობინეს და უთხრეს, რომ იაკობ გულედანი საკანში გარდაცვლილი ნახეს.

მამიდის განცხადებით, გულედანი დაახლოებით სამ-ნახევარი წლის განმავლობაში იმყოფებოდა პატიმრობაში და, ოჯახის ინფორმაციით, გათავისუფლებამდე მხოლოდ „ორ-სამი თვე“ რჩებოდა.

სპეციალური პენიტენციური სამსახურის განცხადებით, მსჯავრდადებული „თანამესაკნემ დილით საპირფარეშოში ჩამომხრჩვალი იპოვა“. უწყების ცნობით, მომხდარის შესახებ დაუყოვნებლივ ეცნობა ქვემო ქართლის პროკურატურას და გამოძიება დაიწყო.

„იძახიან, რომ თავი მოიკლაო“, - ამბობს ვალიდა გულედანი, თუმცა ოჯახის წევრი თვითმკვლელობის ვერსიას დამაჯერებლად არ მიიჩნევს და აცხადებს, რომ „თავს არაფრით მოიკლავდა“.

სპეციალური პენიტენციური სამსახური ასევე განმარტავს, რომ იაკობ გულედანი სასჯელს 2023 წლიდან იხდიდა და მისი სასჯელის დასრულების თარიღი 2028 წელი იყო.

უწყების ინფორმაციით, მსჯავრდადებული 20-კაციან საკანში იმყოფებოდა. რადგან შემთხვევა დილის საათებში მოხდა, მისი თანამესაკნეებიც საკანში იმყოფებოდნენ.

საქმეზე გამოძიებას პროკურატურა აწარმოებს.