თეთრი სახლი რუსეთში შავი ჭირის სავარაუდო შემთხვევასა და მასთან დაკავშირებულ საკარანტინო ზომებს აკვირდება. ამის შესახებ Axios ტრამპის ადმინისტრაციის წარმომადგენელზე დაყრდნობით წერს.

Axios-ის წყაროს თქმით, აშშ-ის ადმინისტრაცია ვითარების შესახებ ინფორმირებულია, მოვლენების განვითარებას აკვირდება და შესაძლო რეაგირების ვარიანტებს აფასებს.

საქმე ეხება რუსეთის ირკუტსკის ოლქში 28 წლის დარია შიპილოვას გარდაცვალებას. ქალი შავი ჭირის კვლევით ინსტიტუტში ლაბორანტად მუშაობდა. რუსულ მედიაში გავრცელებული ინფორმაციით, 25 სექტემბერს მას მუშაობისას შესაძლოა გატეხოდა სინჯარა, რომელიც შავი ჭირის გამომწვევ ბაქტერიას, Yersinia pestis-ს შეიცავდა. თუმცა რუსეთის ჯანდაცვის უწყებებს ეს ვერსია ოფიციალურად არ დაუდასტურებიათ.

შიპილოვა 2 ოქტომბერს გარდაიცვალა. მისი გარდაცვალების შემდეგ დაახლოებით 200 ადამიანი სამედიცინო მეთვალყურეობის ქვეშ მოათავსეს, რამდენიმე სამედიცინო დაწესებულებაში კი საკარანტინო ზომები დაწესდა.

რუსეთის მომხმარებელთა უფლებებისა და საზოგადოებრივი ჯანმრთელობის ზედამხედველობის სამსახური, „როსპოტრებნადზორი“, აცხადებს, რომ ქალს „უცნობი ეტიოლოგიის პნევმონია“ ჰქონდა. უწყების განცხადებით, მისგან აღებულ ნიმუშებში მის პროფესიულ საქმიანობასთან დაკავშირებული მიკროორგანიზმები არ გამოვლენილა და ირკუტსკის ოლქში სანიტარიულ-ეპიდემიოლოგიური ვითარება სტაბილურია.

ამასთან, ბურიატიის ხელმძღვანელმა ალექსეი ციდენოვმა თავდაპირველად განაცხადა, რომ ქალი შავი ჭირით გარდაიცვალა, თუმცა მოგვიანებით ჩანაწერი შეცვალა და აღნიშნა, რომ მას „შესაძლოა შავი ჭირი ჰქონოდა“.

შესაბამისად, ამ დროისთვის ოფიციალურად დადასტურებული არ არის არც ის, რომ 28 წლის ქალი შავი ჭირით გარდაიცვალა და არც ის, რომ რუსეთში დაავადების გავრცელებაა. Axios-იც ინფორმაციას „შავი ჭირის სავარაუდო შემთხვევად/გავრცელებად“ აღწერს.