ევროკომისიამ მიიღო დოკუმენტების პაკეტი, რომელიც ევროკავშირის მომავალი გაფართოებისთვის საჭირო პოლიტიკურ და ინსტიტუციურ ცვლილებებს განსაზღვრავს.
პაკეტი მოიცავს გაფართოებამდე არსებული პოლიტიკის გადახედვას და იმ ნაბიჯებს, რომლებიც ევროკავშირს ახალი წევრების მისაღებად უნდა მოამზადოს. საუბარია ევროკავშირის ინსტიტუტების, პოლიტიკისა და ბიუჯეტის შესაძლო ადაპტაციაზე.
2026 წლის გაფართოების პაკეტის ფარგლებში ევროკომისია საორიენტაციო საგზაო რუკებს ოთხი ქვეყნისთვის წარადგენს: ალბანეთისთვის, მოლდოვისთვის, მონტენეგროსა და უკრაინისთვის, იმ შემთხვევაში, თუ ისინი რეფორმების ტემპს შეინარჩუნებენ.
ევროკომისიის პრეზიდენტის, ურსულა ფონ დერ ლაიენის განცხადებით, გაფართოება ევროკავშირისთვის „გეოპოლიტიკური იმპერატივია“ და თავად ევროკავშირიც მზად უნდა იყოს ახალი წევრების მისაღებად.
მისი თქმით, ამისთვის აუცილებელია ინსტიტუტების მომზადება, პოლიტიკის ახალ რეალობასთან ადაპტირება და შესაბამისი საბიუჯეტო ცვლილებები.
ევროკომისია ხაზს უსვამს, რომ გაფართოების პროცესი კვლავ დამსახურებაზე დაფუძნებული და პირობებზე დამოკიდებული იქნება, ხოლო საჭიროების შემთხვევაში მიღებული ზომები შეიძლება შექცევადიც იყოს.
პაკეტში ერთ-ერთი მნიშვნელოვანი წინადადება გადაწყვეტილებების მიღების წესსაც ეხება.
ევროკომისია მხარს უჭერს, რომ გარკვეულ სფეროებში, მათ შორის სანქციებთან, საგადასახადო თაღლითობასა და ენერგეტიკის სფეროში ფისკალურ ზომებთან დაკავშირებით, ერთსულოვნების ნაცვლად კვალიფიციური უმრავლესობით გადაწყვეტილების მიღების შესაძლებლობა გამოიყენონ.
გაფართოების პროცესში კი კომისია სთავაზობს, რომ მოლაპარაკებების კლასტერების გახსნისა და სხვა შუალედური გადაწყვეტილებების დროსაც კვალიფიციური უმრავლესობის პრინციპი გამოიყენონ, რათა პროცესი უფრო სწრაფი და მოქნილი გახდეს.
