საფრანგეთში სკოლების მდგომარეობის გამო დაწყებული მოსწავლეთა პროტესტი მასშტაბურ დემონსტრაციებში გადაიზარდა. 6 ოქტომბერს ქუჩებში 250 ათასზე მეტი ადამიანი გამოვიდა, სტუდენტური გაერთიანებები კი მონაწილეთა რაოდენობას 450 ათასამდე აფასებენ. აქციებს მოსწავლეებთან ერთად მშობლები, უნივერსიტეტის სტუდენტები და პროფკავშირებიც შეუერთდნენ.
მთავრობის მონაცემებით, პროტესტმა 891 საშუალო სკოლაში შეაფერხა სწავლა. დემონსტრანტები სკოლებისთვის მეტი რესურსის გამოყოფას, მასწავლებლების დეფიციტის აღმოფხვრას და შენობების მდგომარეობის გაუმჯობესებას ითხოვენ.
პარიზსა და მარსელში პოლიციამ ცრემლსადენი გაზი გამოიყენა, რენში კი წყლის ჭავლი. ლიონში სამართალდამცველებსა და დემონსტრანტებს შორის შეტაკებებიც მოხდა.
პროტესტი სექტემბრის შუა რიცხვებში დაიწყო და უკვე ქვეყნის მასშტაბით გავრცელდა. საფრანგეთის ყველაზე დიდი პროფკავშირი CGT აცხადებს, რომ ახალი აქციები კიდევ იგეგმება.
