უკრაინის პრეზიდენტი ვოლოდიმირ ზელენსკი აცხადებს, რომ ქვეყანა მზად არის საპრეზიდენტო არჩევნების ჩასატარებლად, თუ რუსეთი საბრძოლო მოქმედებებს 60 დღით სრულად შეწყვეტს. ამის შესახებ მან ABC News-თან ინტერვიუში ისაუბრა.

ზელენსკის თქმით, აშშ-ის პრეზიდენტ დონალდ ტრამპსა და მის გუნდს არაერთხელ განუმარტა, რომ არჩევნების ორგანიზებისთვის ორთვიანი ზავია აუცილებელი. უკრაინის პრეზიდენტი აცხადებს, რომ მზად არის, პატივი სცეს უკრაინელი ხალხის ნებისმიერ არჩევანს.

მისივე განმარტებით, უკრაინის კანონმდებლობა საომარი მდგომარეობის დროს არჩევნების ჩატარებას კრძალავს. გარდა ამისა, აუცილებელია უსაფრთხო საარჩევნო გარემოს შექმნა და მოქალაქეებისთვის ხმის მიცემის შესაძლებლობის უზრუნველყოფა.

10 ოქტომბერს დონალდ ტრამპმა განაცხადა, რომ უკრაინის პრეზიდენტის თანამდებობაზე ახალი ლიდერის ხილვა სურს. მისი შეფასებით, ზელენსკი რუსეთის წინააღმდეგ ომის დასრულებისთვის საკმარისს არ აკეთებს.

Associated Press-ის ცნობით, ტრამპმა ზელენსკი რუსეთის ნავთობგადამამუშავებელ ქარხნებზე თავდასხმების გამოც გააკრიტიკა. აშშ-ის პრეზიდენტის თქმით, მან უკრაინას დარტყმების შეწყვეტისკენ მოუწოდა, რადგან ისინი გლობალურ პრობლემებს ქმნის, თუმცა თავდასხმები გაგრძელდა.

ზელენსკის განცხადებით, უკრაინა მზად არის, რუსეთის ნავთობგადამამუშავებელ ობიექტებზე იერიშები შეაჩეროს, თუ მოსკოვიც შეწყვეტს უკრაინის ენერგეტიკულ ინფრასტრუქტურაზე თავდასხმებს. მისი პოზიციით, დაძაბულობის შემცირებისკენ მიმართული ნაბიჯები ორმხრივი უნდა იყოს.

უკრაინაში საომარი მდგომარეობის დროს ნებისმიერი დონის არჩევნები აკრძალულია, ხოლო მოქმედი თანამდებობის პირების უფლებამოსილება მის გაუქმებამდე გრძელდება.

ზელენსკის პირველი საპრეზიდენტო ვადა 2024 წლის 20 მაისს ამოიწურა, თუმცა ომის გამო არჩევნები არ ჩატარებულა. მიუხედავად საკანონმდებლო შეზღუდვისა, რუსეთის ხელისუფლების წარმომადგენლები და კრემლის კონტროლირებადი მედიასაშუალებები ამ გარემოებას ზელენსკის ლეგიტიმურობის ეჭვქვეშ დასაყენებლად იყენებენ.