ისრაელის პრეზიდენტმა იცხაკ ჰერცოგმა ქართული წარმოშობის ექიმი-სტომატოლოგი შოთა მუსაევი სამოქალაქო გმირობისთვის დააჯილდოვა. მუსაევი ერთ-ერთია იმ ექვს ადამიანს შორის, რომლებმაც Flydubai-ის რეისზე მომხდარი თავდასხმის დროს 182 ადამიანის გადარჩენაში მნიშვნელოვანი როლი შეასრულეს.

30 სექტემბერს, დუბაიდან თელ-ავივისკენ მიმავალ თვითმფრინავში, მეორე პილოტი კაპიტანს დანით დაესხა თავს. ისრაელის ხელისუფლების ინფორმაციით, თავდამსხმელი თვითმფრინავის ჩამოგდებას ცდილობდა.

შოთა მუსაევი სხვა მგზავრებს თავდამსხმელის შეჩერებაში დაეხმარა, შემდეგ კი მძიმედ დაჭრილ კაპიტანს პირველადი სამედიცინო დახმარება აღმოუჩინა, ძლიერი სისხლდენა შეუჩერა და თვითმფრინავის დაშვებამდე მის მდგომარეობას აკონტროლებდა.

თვითმფრინავი საუდის არაბეთის ქალაქ ტაბუკში ავარიულად დაეშვა. ბორტზე მყოფი 174 მგზავრი და ეკიპაჟის რვავე წევრი გადარჩა.

დაჯილდოების ცერემონიაზე ისრაელის პრეზიდენტმა შოთა მუსაევის ქართულ წარმომავლობასაც გაუსვა ხაზი და აღნიშნა, რომ სახელი შოთა ქართველებისთვის უდიდეს პოეტს, შოთა რუსთაველს უკავშირდება, რომლის პოეზიაზეც თავადაც გაიზარდა.

ისრაელის მედიის ცნობით, თავდამსხმელი მეორე პილოტი თელ-ავივის ბენ-გურიონის აეროპორტთან თვითმფრინავის შეჯახებას გეგმავდა. გამოძიების ვერსიით, იგი წინასწარ მომზადებული გეგმით მოქმედებდა. თავდამსხმელი დაკავებულია.