მექსიკის პრეზიდენტმა კლაუდია შეინბაუმმა წყნარი ოკეანის სანაპიროზე მცხოვრებ მოსახლეობას სახლებში დარჩენისა და უსაფრთხოების წესების დაცვისკენ მოუწოდა. ქვეყანას მეოთხე კატეგორიის ძლიერი ქარიშხალი „საიმონი“ უახლოვდება.

აშშ-ის ქარიშხლების ეროვნული ცენტრის (NHC) 11 ოქტომბრის დილის მონაცემებით, ქარის სიჩქარე საათში 230 კილომეტრს აღწევდა. ქარიშხალი კოლიმის შტატის საპორტო ქალაქ მანსანილიოდან დაახლოებით 105 კილომეტრში იმყოფებოდა.

„მოვუწოდებთ ხალისკოს, კოლიმის, ნაიარიტისა და მიჩოაკანის სანაპირო მუნიციპალიტეტების მოსახლეობას, დარჩნენ უსაფრთხო ადგილებში, ვიდრე ხელისუფლება საფრთხის დასრულებას ოფიციალურად არ გამოაცხადებს“, - დაწერა შეინბაუმმა სოციალურ ქსელ X-ზე.

საფრთხის შემცველი ტერიტორიებიდან მოსახლეობის პრევენციული ევაკუაცია მიმდინარეობს. ხელისუფლებამ კოლიმისა და ხალისკოს შტატების 28 მუნიციპალიტეტში განგაშის უმაღლესი დონე გამოაცხადა, კიდევ 93 მუნიციპალიტეტში კი მაღალი საფრთხის რეჟიმი მოქმედებს.

დროებით დაიხურა პუერტო-ვალიარტის საერთაშორისო აეროპორტი, შეჩერებულია არასავალდებულო საქმიანობა და მოწყობილია საგანგებო თავშესაფრები.

სინოპტიკოსების პროგნოზით, ქარიშხალი მექსიკის სანაპიროს 11 ოქტომბერს მიუახლოვდება და 12 ოქტომბერსაც მის სიახლოვეს დარჩება. ჯერ უცნობია, ქარიშხლის ცენტრი ხმელეთზე გადავა თუ სანაპიროს გასწვრივ იმოძრავებს.

მოსალოდნელია ძლიერი ქარი, მაღალი ტალღები და უხვი ნალექი, რამაც შესაძლოა სიცოცხლისთვის საშიში წყალდიდობები და მეწყრები გამოიწვიოს, განსაკუთრებით მთიან რაიონებში.

ადგილზე მობილიზებულია სამხედროები, მაშველები და სამოქალაქო დაცვის სამსახურები.