ილონ მასკი აცხადებს, რომ მისი კომპანია SpaceX ინდოეთის ბაზარზე Starlink-ის სატელიტურ ინტერნეტს ხელმისაწვდომ ფასად შესთავაზებს მომხმარებლებს. ამით მასკი კონკურენციას გაუწევს ინდოელი მილიარდერის, მუკეშ ამბანის სატელეკომუნიკაციო კომპანია Reliance Jio-ს.

Reuters-ის ცნობით, განცხადება რამდენიმე დღით ადრე გაკეთდა, ვიდრე Jio Platforms ინდოეთის ისტორიაში ყველაზე მასშტაბური პირველადი საჯარო შეთავაზების (IPO) განხორციელებას გეგმავს. კომპანიის სამიზნე საბაზრო შეფასება დაახლოებით 106 მილიარდი დოლარია.

ინდოეთი მსოფლიოში ერთ-ერთი ყველაზე იაფი მობილური ინტერნეტის ბაზარია, სადაც ერთი გიგაბაიტი მონაცემების საშუალო ღირებულება დაახლოებით 8 აშშ ცენტია.

„ცხადია, თუ Starlink ინდოეთში ზედმეტად ძვირი იქნება, მას არავინ იყიდის. ამიტომ SpaceX-ს ხელმისაწვდომი ფასების დაწესება მოუწევს“, - დაწერა მასკმა სოციალურ ქსელ X-ზე.

მასკის თქმით, კონკურენცია ინდოელ მომხმარებლებს მეტ არჩევანს მისცემს, თუმცა ამბანის კომპანიის მოგებას შეამცირებს.

მილიარდერმა ინდოეთის ხელისუფლება და ამბანი Starlink-ის ბაზარზე შესვლის შეფერხებაშიც დაადანაშაულა. მისი მტკიცებით, პროცესი Reliance Jio-ს სასარგებლოდ ჭიანურდება.

ინდოეთის მთავრობა ბრალდებებს უარყოფს და აცხადებს, რომ სატელიტური ინტერნეტის დანერგვის მსურველი სამივე კომპანია, მათ შორის Starlink და Jio, უსაფრთხოების საბოლოო ნებართვას ელოდება.

მასკმა ამბანის ირონიულად „პრემიერ-მინისტრი ამბანი“ უწოდა და ჰკითხა, დაუშვებდა თუ არა Starlink-ს კონკურენციაში.

Reliance-ს მასკის განცხადებებზე კომენტარი არ გაუკეთებია.