აშშ-ის პრეზიდენტმა დონალდ ტრამპმა განაცხადა, რომ რუსეთი და უკრაინა ენერგეტიკულ ობიექტებზე თავდასხმების შეწყვეტაზე შეთანხმდნენ და ზავი დაუყოვნებლივ ამოქმედდა. თუმცა უკრაინის პრეზიდენტი ვოლოდიმირ ზელენსკი აცხადებს, რომ შეთანხმების შესახებ ინფორმაცია მისთვის სიახლეა და კიევი დამატებით დეტალებს ელოდება.

„დაუყოვნებლივ ძალაში შედის ენერგეტიკული ზავი რუსეთსა და უკრაინას შორის ომში. ორივე მხარე დათანხმდა. არ დაარღვიოთ იგი!“ - დაწერა ტრამპმა 11 ოქტომბერს სოციალურ ქსელ Truth Social-ზე.

აშშ-ის პრეზიდენტს შეთანხმების პირობები, ხანგრძლივობა და მისი შესრულების კონტროლის მექანიზმები არ დაუკონკრეტებია.

ტრამპის განცხადებას ზელენსკი გამოეხმაურა და აღნიშნა, რომ შეთანხმების შესახებ მანამდე არაფერი იცოდა. თუმცა უკრაინის პრეზიდენტმა მზადყოფნა გამოთქვა, შეწყვიტოს რუსეთის ნავთობგადამამუშავებელ ობიექტებზე თავდასხმები, თუ მოსკოვიც შეწყვეტს უკრაინის ენერგეტიკულ ინფრასტრუქტურაზე იერიშებს.

ზელენსკის თქმით, ნებისმიერი შეთანხმება ორმხრივი უნდა იყოს და მისი შესრულება რეალური გარანტიებით უნდა განმტკიცდეს. უკრაინის პრეზიდენტი ამერიკული მხარისგან შეთანხმების დეტალებს ელოდება.

ამ დროისთვის რუსეთის მხრიდან „ენერგეტიკულ ზავზე“ შეთანხმება ოფიციალურად არ დადასტურებულა.

ტრამპის განცხადებამდე ზელენსკიმ ABC News-თან ინტერვიუში თქვა, რომ უკრაინა მზად არის საპრეზიდენტო არჩევნების ჩასატარებლად, თუ რუსეთი 60-დღიან სრულ ცეცხლის შეწყვეტას დათანხმდება.

აღსანიშნავია, რომ ენერგეტიკულ ობიექტებზე თავდასხმების შეჩერება არ ნიშნავს სრულ ცეცხლის შეწყვეტას. შესაბამისად, ტრამპის მიერ გამოცხადებული „ენერგეტიკული ზავი“ არ არის ის 60-დღიანი სრული ზავი, რომელსაც ზელენსკი არჩევნების ჩატარების პირობად ასახელებს.