წარმოიდგინეთ ავტომობილი, რომელიც ადგილიდან 100 კმ/სთ-ზე მეტ სიჩქარეს წამზე ნაკლებ დროში ავითარებს, ოთხ წამში კი თითქმის 500 კმ/სთ-ს აღწევს. ეს Top Fuel დრეგ-რეისინგია, მსოფლიოში ერთ-ერთი ყველაზე ექსტრემალური ავტოსპორტი, სადაც ქალები კაცებს რეგულარულად ამარცხებენ.
BBC-ის ინფორმაციით, ევროპის ბოლო ცხრა ჩემპიონატიდან შვიდი ქალებმა მოიგეს. ამასთან, 2026 წელს ევროპისა და აშშ-ის Top Fuel-ის შეჯიბრებებში მონაწილე მძღოლების 20% ქალი იყო. შედარებისთვის, ფორმულა 1-ის გრან-პრიზე ქალი მრბოლელის გამოსვლიდან თითქმის 50 წელი გავიდა.
შვედმა სუზან კალინმა სექტემბერში ზედიზედ მეორედ მოიპოვა ევროპის ჩემპიონის ტიტული. მისი თქმით, ავტომობილის აჩქარების შეგრძნება ზარბაზნიდან გასროლას ჰგავს.
Top Fuel-ის რბოლა სულ 305-მეტრიან სწორ მონაკვეთზე მიმდინარეობს. მანქანები 500 კმ/სთ-ზე მეტ სიჩქარესაც ავითარებენ, ხოლო ფინიშზე მათ შესაჩერებლად სპეციალური პარაშუტები გამოიყენება.
მკვლევრების შეფასებით, ქალების წარმატებას ხელს უწყობს ამ სპორტში არსებული ტრადიციები, ქალი ჩემპიონების მაგალითები და შედარებით ხელმისაწვდომი საწყისი პირობები.
ქალები დრეგ-რეისინგში ჯერ კიდევ ათწლეულების წინ აღწევდნენ წარმატებას. 1977 წელს შირლი მალდოუნი პირველი ქალი გახდა, რომელმაც აშშ-ის Top Fuel-ის ჩემპიონატი მოიგო.
დღეს კალინი ახალი რეკორდისკენ მიისწრაფვის: მას სურს, ისტორიაში პირველი მრბოლელი გახდეს, რომელიც ევროპის ჩემპიონატს ზედიზედ სამჯერ მოიგებს.
