კომუნიკაციების კომისია უარყოფს „საერთაშორისო გამჭვირვალობა - საქართველოს“ ბრალდებას, რომ კრიტიკულ ტელევიზიებს 93 სიტყვისა და ფრაზის გამოყენებას უზღუდავს.

ორგანიზაციამ „ფორმულისა“ და „ტვ პირველის“ წინააღმდეგ შედგენილი შვიდი მოხსენებითი ბარათი შეისწავლა და გამოავლინა 93 განსხვავებული სიტყვა და ფრაზა, რომელთა გამოყენებასაც, მისი ინფორმაციით, კომისია მაუწყებლებს ედავება.

მათ შორისაა: „რეჟიმი“, „ოლიგარქი“, „პოლიტიკური პატიმრები“, „სინდისის პატიმრები“, „ივანიშვილის პრემიერი“, „რეპრესიული კანონები“ და „სასამართლო კლანი“.

ორგანიზაციის ცნობით, ბოლო ექვს თვეში კომისიამ ორივე ტელევიზია რამდენჯერმე დააჯარიმა. მხოლოდ 1 ოქტომბერს „ფორმულას“ 10 000-ლარიანი ჯარიმა დაეკისრა.

კომუნიკაციების კომისია აცხადებს, რომ აკრძალული სიტყვების სია არ არსებობს. უწყების განმარტებით, კანონი მაუწყებლებს ახალი ამბებისა და პოლიტიკური საკითხების პირადი მოსაზრებების საფუძველზე გაშუქებას უზღუდავს.

„საერთაშორისო გამჭვირვალობა - საქართველო“ კი მიიჩნევს, რომ კომისია ცენზორის ფუნქციას ასრულებს და ფინანსური სანქციებით კრიტიკული მედიის დასუსტებას ცდილობს.