აშშ-ისა და უკრაინის პრეზიდენტებს შორის ურთიერთობა კიდევ უფრო დაიძაბა. დონალდ ტრამპმა ვოლოდიმირ ზელენსკი რუსეთის პრეზიდენტ ვლადიმირ პუტინზე რთულ პარტნიორად მოიხსენია და უკრაინის მიერ რუსულ ნავთობგადამამუშავებელ ქარხნებზე განახლებული თავდასხმები გააკრიტიკა.

„ზელენსკისთან შეთანხმება უფრო რთულია, ვიდრე პუტინთან“, - განაცხადა ტრამპმა ტელეკომპანია Newsmax-თან ინტერვიუში. მისი თქმით, უკრაინის დარტყმები რუსულ ნავთობგადამამუშავებელ ობიექტებზე საწვავის მსოფლიო ფასებს ზრდის. ამერიკის პრეზიდენტმა ამ თავდასხმებს „სამარცხვინო“ უწოდა და ზელენსკი ომის დასრულების სურვილის არქონაშიც დაადანაშაულა.

„მე მხოლოდ უკრაინის ინტერესებს ვიცავ. თუ ამას არ გავაკეთებ, სხვა ვინ გააკეთებს?“ - უპასუხა ზელენსკიმ ბრიუსელში, ევროკავშირის სამიტზე.

დაპირისპირების ერთ-ერთი მთავარი მიზეზი ვაშინგტონსა და მოსკოვს შორის რუსული დიზელის იმპორტზე მიღწეული შეთანხმებაა. ზელენსკის შეფასებით, ეს გადაწყვეტილება პუტინისთვის საჩუქარია, რადგან რუსეთს დამატებით შემოსავალს აძლევს და ომის გაგრძელებას უწყობს ხელს. უკრაინის პრეზიდენტი შიშობს, რომ დიზელის შეთანხმებას შესაძლოა გაზის სფეროში თანამშრომლობაც მოჰყვეს.

ვითარება მას შემდეგ გამწვავდა, რაც ტრამპმა უკრაინისა და რუსეთის ენერგეტიკულ ინფრასტრუქტურაზე თავდასხმების შეწყვეტის შესახებ გამოაცხადა. კიევმა დარტყმების შეჩერების მზადყოფნა გამოთქვა, თუმცა მოსკოვმა შეთანხმების არსებობა უარყო და უკრაინის ენერგოობიექტებზე შეტევები განაგრძო. სამი დღის შემდეგ ზელენსკიმ რუსეთის ნავთობგადამამუშავებელ ქარხნებზე თავდასხმების განახლების გადაწყვეტილება მიიღო.

დაძაბულობას დაემატა უკრაინის სამხედროებისთვის მნიშვნელოვანი ამერიკული სატელიტური საკომუნიკაციო სისტემის მუშაობის შეზღუდვაც. ზელენსკიმ ამას „ძალიან საშიში და უსიამოვნო სიურპრიზი“ უწოდა.

ამ ფონზე უკრაინის პრეზიდენტმა მხარდაჭერის მისაღებად ბრიუსელში ევროპელ ლიდერებთან შეხვედრები გამართა. ევროკომისიის პრეზიდენტმა ურზულა ფონ დერ ლაიენმა განაცხადა, რომ რუსეთმა ენერგეტიკული ცეცხლის შეწყვეტის პირობები არ დაიცვა და მის წინააღმდეგ სანქციები უნდა გამკაცრდეს.

ევროკავშირის სამიტის ერთ-ერთი მთავარი საკითხი უკრაინის ფინანსური, სამხედრო და ენერგეტიკული მხარდაჭერაა, განსაკუთრებით მოახლოებული ზამთრის წინ. რუსული თავდასხმების შედეგად უკრაინის არაერთ რეგიონში ენერგომომარაგება კვლავ შეფერხებულია.

ზელენსკიმ ხაზგასმით აღნიშნა, რომ უკრაინას ომის რაც შეიძლება სწრაფად დასრულება სურს, თუმცა რუსეთი მშვიდობისკენ რეალურ ნაბიჯებს არ დგამს.

ბრიუსელში გამართულ პრესკონფერენციაზე ჟურნალისტმა ზელენსკის ჰკითხა, მიაჩნდა თუ არა, რომ ტრამპი მას საკუთარი პოლიტიკური პრობლემების გადასაფარად იყენებდა. უკრაინის პრეზიდენტმა კითხვას 15-წამიანი დუმილითა და ღიმილით უპასუხა, შემდეგ კი თქვა: „ეს არის ჩემი პასუხი“.