დიდი ბრიტანეთის მიერ სანქცირებულ ტელეკომპანია „იმედში“ მფლობელთა შემადგენლობა შეიცვალა. ტელევიზიის მფლობელი კომპანიის წილები ოთხ ფიზიკურ პირზე, თანაბრად, 25-25 პროცენტით გადანაწილდა.
საჯარო რეესტრში 16 ოქტომბერს წარდგენილი დოკუმენტების მიხედვით, „ჯორჯიან მედია პროდაქშენ გრუპში“ წილები სრულად დათმეს „პრაიმ მედია გლობალმა“, ვასილ კალანდარიშვილმა და ნათია სონღულაშვილმა.
ტელეკომპანიის ახალი მეწილე ტელეწამყვანი მაგდა ანიკაშვილი გახდა, ხოლო სამი მოქმედი მეწილის წილი 10%-დან 25%-მდე გაიზარდა.
წილები ასე გადანაწილდა:
დოკუმენტების თანახმად, გარიგებები სიმბოლურ ფასად გაფორმდა: ნათია სონღულაშვილმა და ვასილ კალანდარიშვილმა 10-10%-იანი წილები თითო 100 ლარად გაყიდეს, ხოლო „პრაიმ მედია გლობალმა“ საკუთარი 50%-იანი წილი 500 ლარად დათმო.
„იმედის“ მფლობელთა ცვლილებები მიმდინარე წელს მეორედ ხდება. 6 თებერვალს ბიზნესმენმა ირაკლი რუხაძემ ტელეკომპანიის გაყიდვის შესახებ განაცხადა. მაშინ „ჯორჯიან მედია პროდაქშენ გრუპი“ 1000 ლარად შეიძინა „პრაიმ მედია გლობალმა“, რომლის სრული მფლობელი ბიზნესმენი ილია მიქელაიშვილია. კომპანიის წილების ნახევარი მოგვიანებით ტელევიზიის ხელმძღვანელ პირებზე გადანაწილდა.
24 თებერვალს დიდმა ბრიტანეთმა „იმედსა“ და POSTV-ს სანქციები დაუწესა. ბრიტანეთის ხელისუფლებამ გადაწყვეტილების საფუძვლად რუსეთის მიერ უკრაინაში წარმოებულ ომთან დაკავშირებით შეცდომაში შემყვანი ინფორმაციის გავრცელება დაასახელა. სანქციების გამოცხადებიდან მეორე დღეს ირაკლი რუხაძემ და კიდევ სამმა წევრმა „იმედის“ სამეთვალყურეო საბჭო დატოვეს.
ტელეკომპანიის ფინანსური მდგომარეობაც მძიმეა. 2025 წელი „იმედმა“ 43 მილიონი ლარის ზარალით დაასრულა, ხოლო დაგროვილმა ზარალმა 497,2 მილიონ ლარს მიაღწია. მეწილეებისა და მათთან დაკავშირებული კომპანიების მიმართ არსებული სასესხო ვალდებულებები 358,7 მილიონ ლარს შეადგენს. აუდიტორული კომპანია „ბესტ აუდიტი“ ფინანსური მდგომარეობის გამო კომპანიის საქმიანობის უწყვეტად გაგრძელებასთან დაკავშირებულ მნიშვნელოვან გაურკვევლობაზე მიუთითებს.
ცვლილებები შეეხო კიდევ ერთ სანქცირებულ ტელეკომპანიას, POSTV-საც. 15 ოქტომბერს ცნობილი გახდა, რომ დეპუტატმა ვიქტორ ჯაფარიძემ ტელევიზიის 52%-იანი წილი, რომელიც 2022 წელს 520 000 ლარად შეიძინა, გიორგი შენგელიას 1000 ლარად მიჰყიდა. შენგელია მანამდე ამ წილის მმართველი იყო.
„იმედის“ წილების გადანაწილების მიზეზები და გარიგებების დამატებითი გარემოებები საჯაროდ ჯერ არ განმარტებულა.
