აშშ-ის პრეზიდენტის, დონალდ ტრამპის განცხადებით, უკრაინაში ომის დასრულება რუსეთისა და უკრაინის ლიდერებს სურთ, თუმცა სამშვიდობო შეთანხმების მიღწევით ვლადიმირ პუტინი უფრო მეტადაა დაინტერესებული, ვიდრე ვოლოდიმირ ზელენსკი.

12 ოქტომბერს ჟურნალისტებთან საუბრისას ტრამპმა განაცხადა, რომ ორივე ლიდერს შეთანხმებისკენ უბიძგებს, თუმცა არ დაუკონკრეტებია, რას ეფუძნება მისი შეფასება ან როგორ აპირებს მხარეების დაყოლიებას.

მანამდე, 11 ოქტომბერს, ტრამპმა სოციალურ ქსელ Truth Social-ში დაწერა, რომ რუსეთი და უკრაინა „ენერგეტიკულ ზავზე“ შეთანხმდნენ და ის დაუყოვნებლივ ამოქმედდა.

ზელენსკის თქმით, ეს განცხადება მისთვის მოულოდნელი იყო. უკრაინა მზადყოფნას გამოთქვამს, შეწყვიტოს ენერგეტიკულ ობიექტებზე თავდასხმები, თუ იმავეს რუსეთიც გააკეთებს. კრემლში კი განაცხადეს, რომ კონტაქტები გრძელდება, თუმცა შეთანხმება არ დაუდასტურებიათ.

12 ოქტომბერს, ვარშავის უსაფრთხოების ფორუმზე გამოსვლისას, ზელენსკიმ განაცხადა, რომ ტრამპის მიერ ზავის გამოცხადების შემდეგ რუსეთმა უკრაინის ენერგოინფრასტრუქტურაზე თავდასხმები განაგრძო.

რუსეთის საგარეო საქმეთა მინისტრმა სერგეი ლავროვმა კი აღნიშნა, რომ მოსკოვს უკრაინაში ომის მიზნები არ შეუცვლია და მათ მიღწევას განაგრძობს.

ტრამპმა ბოლო პერიოდში ზელენსკის კრიტიკა გაამწვავა. 10 ოქტომბერს მან განაცხადა, რომ უკრაინას რუსეთთან შეთანხმების მისაღწევად ახალი ლიდერი სჭირდება.

აშშ-ის შუამავლობით დაწყებულ სამშვიდობო მოლაპარაკებებს ჯერჯერობით შედეგი არ მოჰყოლია.