უკრაინის პრეზიდენტ ვოლოდიმირ ზელენსკის განცხადებით, კიევის შეფასებით, რუსეთი სექტემბერში დაგეგმილი საპარლამენტო არჩევნების შემდეგ დამატებით 300 ათასი ჯარისკაცის გაწვევას გეგმავს.

ზელენსკის თქმით, რუსეთმა შესაძლოა მობილიზაცია 2027 წელსაც გააგრძელოს და დამატებითი ძალები ძირითადად ქვეყნის შორეული რეგიონებიდან შეავსოს.

მისივე განცხადებით, რუსეთის არმია აღმოსავლეთ უკრაინაში შეტევას აგრძელებს, თუმცა წინსვლა დიდ დანაკარგებთან არის დაკავშირებული.

ზელენსკიმ ასევე თქვა, რომ უკრაინა ზამთრისთვის რუსეთის მხრიდან ენერგეტიკულ ინფრასტრუქტურაზე ახალი დარტყმებისთვის ემზადება. მისი თქმით, ქვეყანას საჰაერო თავდაცვის დამატებითი რაკეტები სჭირდება, რადგან არსებული მარაგები არასაკმარისია.

უკრაინის პრეზიდენტის განცხადებით, რუსეთი ბალისტიკური რაკეტების წარმოების გაზრდასაც გეგმავს - წელიწადში დაახლოებით 1 300 ერთეულამდე.

ამასთან, ზელენსკის თქმით, უკრაინას მიმდინარე წელს თავდაცვის დაფინანსებაში დაახლოებით 27 მილიარდი დოლარის დეფიციტი აქვს.