23 აგვისტოს ღამეს რუსეთის ქალაქ ორენბურგში უპილოტო საფრენი აპარატები კომპანია Ozon-ის ლოგისტიკის კომპლექსს დაესხნენ თავს.

ადგილობრივი ხელისუფლების განცხადებით, საწყობის ტერიტორიაზე დრონის ნამსხვრევები ჩამოვარდა და ხანძარი გაჩნდა. თუმცა მოგვიანებით გავრცელებულ ვიდეოში ჩანს, რომ საწყობს უშუალოდ დრონი მოხვდა.

Ozon-ის ინფორმაციით, კომპლექსიდან 300-ზე მეტი თანამშრომლის ევაკუაცია განხორციელდა, ხოლო საწყობმა საქონლის მიღება დროებით შეაჩერა.

ეს ბოლო 48 საათში Ozon-ის მეორე საწყობია, რომელზეც იერიში განხორციელდა. 22 აგვისტოს დრონები კომპანიის საწყობს სამარის ოლქშიც დაესხნენ თავს.

ამავე ღამეს ხანძარი გაჩნდა სანქტ-პეტერბურგის კოლპინოს რაიონშიც, Ozon-ის საწყობიდან დაახლოებით 350 მეტრში. ხანძრის მიზეზი ოფიციალურად უცნობია.

რუსეთის თავდაცვის სამინისტროს განცხადებით, ღამის განმავლობაში 328 დრონი ჩამოაგდეს. უკრაინულ მხარეს დარტყმებზე კომენტარი ჯერ არ გაუკეთებია.