გერმანიაში, ავსტრიასა და უნგრეთში ჰელოუინის დროს ბავშვებისთვის დარიგებულ ტკბილეულში ნემსები და სხვა ბასრი ლითონის საგნები აღმოაჩინეს, რის გამოც პოლიციამ მშობლებს მოუწოდა, ყურადღებით შეამოწმონ, რა მიიღეს მათმა შვილებმა.

გერმანიის რამდენიმე ფედერალურ მიწაზე, ბავარიიდან (სამხრეთ-აღმოსავლეთი) ქვემო საქსონიამდე (ჩრდილოეთი), პოლიციამ მსგავსი შემთხვევები დააფიქსირა.

ბრემერვერდეში, ჰამბურგის დასავლეთით, ცხრა წლის გოგონამ ენა დაიზიანა შოკოლადის ფილას ჭამისას. მოგვიანებით, შოკოლადში 5 სანტიმეტრის (2 დუიმი) სიგრძის ნემსი აღმოაჩინეს.

ამასობაში, უნგრეთში პოლიციამ სისხლის სამართლის გამოძიება დაიწყო მას შემდეგ, რაც გიომრიოსა და მის მიმდებარე ტერიტორიებზე, ბუდაპეშტის აღმოსავლეთით, ბავშვებისთვის დარიგებულ ტკბილეულში ლურსმნები, ხრახნები და მავთულის ნაჭრები იპოვეს.

ადგილობრივმა ხელისუფლებამ განაცხადა, რომ ერთ გოგონას მიაწოდეს ტკბილეული, რომელშიც შოკოლადის შეფუთვაში ლურსმანი იყო ჩადებული, თუმცა საბედნიეროდ, მან დროულად შენიშნა და ტკბილეული არ გადაყლაპა.

ავსტრიის მასშტაბითაც რამდენიმე მსგავსი შემთხვევა დაფიქსირდა. ქვეყნის შინაგან საქმეთა მინისტრმა გერჰარდ კარნერმა ინციდენტები "სასოწარკვეთილად, ბოროტად და ზოგ შემთხვევაში სიცოცხლისთვის საშიშად" შეაფასა.

ავსტრიის პოლიციის ცნობით, გამოძიება ოთხ ფედერალურ მიწაზე მიმდინარეობს. ამსტეტენის რაიონში, ლინცის აღმოსავლეთით, 10 წლის გოგონამ მსუბუქი დაზიანება მიიღო პირში, როდესაც პატარა შოკოლადის ფილაში ჩაკბიჩა.

ქვემო ავსტრიის გუბერნატორმა იოჰანა მიკლ-ლაიტნერმა განაცხადა, რომ დამნაშავეებმა კანონის სრული სიმკაცრე უნდა იგრძნონ და დაამატა: "ჩვენს ბავშვებს უდარდელი ბავშვობა ეკუთვნით და ამას მომავალშიც უზრუნველვყოფთ".

გერმანიის სამხრეთ-აღმოსავლეთ ბავარიის პოლიციის ცნობით, მიუხედავად იმისა, რომ მსგავსი შემთხვევები ბოლო ორ წელშიც დაფიქსირდა, წლევანდელი საწყისი მონაცემები ინციდენტების მნიშვნელოვან ზრდაზე მიუთითებს.

ბავარიაში პოლიციამ სულ 25 შემთხვევა დააფიქსირა, როდესაც ტკბილეულში ნემსები, ხრახნები ან ლურსმნები აღმოჩნდა.

დასავლეთ ბავარიის შუა ფრანკონიის პოლიციამ ასევე გააფრთხილა საზოგადოება, რომ არსებობს მიბაძვის რისკი, მას შემდეგ, რაც ერთმა დედამ შოკოლადის ფილაში ნემსი იპოვა და პოლიციას მიმართა. მოგვიანებით, მან პოლიციას აცნობა, რომ მისმა შვილმა აღიარა, ნემსი თავად ჩადო.