31 ოქტომბერს გერმანიის დაახლოებით 30 ქალაქში ახალგაზრდების მასშტაბური საპროტესტო აქციებია დაგეგმილი. ორგანიზატორების ინფორმაციით, დემონსტრაციებში მონაწილეობისთვის უკვე 150 ათასამდე ადამიანი დარეგისტრირდა.

აქციები ბერლინში, ფრანკფურტში, კიოლნსა და სხვა ქალაქებში გაიმართება. პროტესტს ახალგაზრდული მოძრაობა „GenZ regelt!“ („ჯენ-ზი აგვარებს“) ორგანიზებას უწევს.

გერმანელი ახალგაზრდები უერთდებიან ევროპაში მიმდინარე საპროტესტო ტალღას, რომელმაც ბოლო კვირებში საფრანგეთი, იტალია და ესპანეთიც მოიცვა.

პროტესტის მთავარი მიზეზებია ცხოვრების გაძვირება, განათლებისა და ჯანდაცვის დაფინანსების შემცირება და ხელისუფლების გადაწყვეტილებები, რომლებშიც, ახალგაზრდების შეფასებით, მათი ინტერესები გათვალისწინებული არ არის.

მომიტინგეები ასევე აპროტესტებენ სამხედრო ხარჯების ზრდას და შიშობენ, რომ გერმანიაში შესაძლოა სავალდებულო სამხედრო სამსახური აღდგეს.

„აღარ გვსურს, გულხელდაკრეფილებმა ვუყუროთ, როგორ წყდება ჩვენი მომავალი ისე, რომ ჩვენი ხმა არავის ესმის“, - აცხადებენ მოძრაობის წარმომადგენლები.

ორგანიზატორები მშვიდობიანი პროტესტისკენ მოუწოდებენ მონაწილეებს. მიუხედავად ამისა, ევროპაში წინა დემონსტრაციების დროს მომხდარი დაპირისპირებების გათვალისწინებით, გერმანიის პოლიცია უსაფრთხოების გაძლიერებულ ზომებს გეგმავს.