DataFest Tbilisi, აღმოსავლეთ ევროპისა და ცენტრალური აზიის ყველაზე მასშტაბური მონაცემთა ფესტივალი, წელს ათი წლის იუბილეს აღნიშნავს. საიუბილეო გამოშვება 26-28 ნოემბერს, თბილისში, სასტუმრო Pullman Tbilisi Axis Towers-ში გაიმართება და 1 200-ზე მეტ მონაწილეს უმასპინძლებს.

DataFest Tbilisi 2026 ტექნოლოგიების, ბიზნესის, მეცნიერების, მედიისა და შემოქმედებითი ინდუსტრიების წარმომადგენლებს გააერთიანებს. წლევანდელი ფესტივალის კონცეფციაა: წარსული, აწმყო და მომავალი - მონაცემთა სფეროს განვითარების გზის, მიმდინარე გამოწვევებისა და სამომავლო პროგნოზების განხილვა.

ფესტივალის პროგრამაში განსაკუთრებული ადგილი დაეთმობა ხელოვნურ ინტელექტს, მის პრაქტიკულ გამოყენებას, ბიზნესსა და საზოგადოებაზე გავლენას, ეთიკურ AI-სა და კრეატიულ ტექნოლოგიებს.

სამი დღის განმავლობაში მონაწილეებს შესაძლებლობა ექნებათ, დაესწრონ ინსპირაციულ გამოსვლებს, პანელურ დისკუსიებსა და პრაქტიკულ ვორკშოპებს, ჩაერთონ ლაბორატორიებში, დატათონებსა და ჰაკათონებში, ასევე გაეცნონ სტარტაპებისა და ბიზნესის ინოვაციურ პროდუქტებს.

„ბოლო ათწლეულის განმავლობაში ჩვენი თემი მნიშვნელოვნად გაიზარდა როგორც მასშტაბით, ისე პროფესიული გამოცდილებით. თუ პირველ ფესტივალზე დიდწილად საერთაშორისო ექსპერტებს ვეყრდნობოდით, დღეს ჩვენი სპიკერების უმრავლესობას უკვე ადგილობრივი პროფესიონალები წარმოადგენენ და ამ ცვლილებით განსაკუთრებით ვამაყობთ,“ - ამბობს ნინო მაჭარაშვილი, DataFest Tbilisi-ის დამფუძნებელი და გუნდის ხელმძღვანელი.

პროგრამა 4 ძირითად მიმართულებას გააერთიანებს:

●      საზოგადოება - ადამიანის უფლებები, მიყურადება და კონფიდენციალურობა, ეთიკური AI, მედია, გენდერი, ტექნოლოგიები და საზოგადოება;

●      ბიზნესი და სტარტაპები - AI-ისა და მონაცემების გამოყენება, ფინტექი, ტელეკომუნიკაციები, ბიზნესის ტრანსფორმაცია, მეწარმეობა;

●      ტექნოლოგიები - ახალი ხელსაწყოები, სამუშაო ჩარჩოები, მოდელები, ინფრასტრუქტურა და ტექნოლოგიური ინოვაციები;

●      დიზაინი, ხელოვნება და კომუნიკაციები - მონაცემთა ვიზუალიზაცია, კრეატიული AI, სთორითელინგი და შემოქმედებითი საქმიანობის მომავალი.

საიუბილეო წელს ფესტივალს ორი ახალი ინიციატივა ემატება. გასულ წელს დაწყებული წარმატებული საბავშვო პროგრამის შემდეგ, წელს პირველად ჩატარდება სპეციალური პროგრამა უფროსი თაობის წარმომადგენლებისთვისაც.  პროგრამა მათ ტექნოლოგიებთან დაკავშირებულ პრაქტიკულ გამოცდილებას შესთავაზებს. ასევე, პირველად ჩატარდება Decade Impact Awards, რომელიც ბოლო ათი წლის განმავლობაში რეგიონში მონაცემთა ეკოსისტემის განვითარებაში შეტანილ მნიშვნელოვან წვლილს აღნიშნავს.

2017 წელს დაარსების შემდეგ, DataFest Tbilisi-მა 80 ქვეყნიდან 6 000-ზე მეტ მონაწილეს უმასპინძლა. ფესტივალის ფარგლებში 45 ქვეყნიდან 500-ზე მეტი სპიკერი და ტრენერი მონაწილეობდა, ჩატარდა 500-ზე მეტი ინსპირაციული და პრაქტიკული სესია, ხოლო მთელი წლის განმავლობაში ორგანიზებული შეხვედრების რაოდენობამ 40-ს გადააჭარბა.

DataFest Tbilisi-ს ორგანიზებას ForSet უწევს.

ფესტივალის მთავარი პარტნიორები არიან: ნიდერლანდების სამეფოს საელჩო საქართველოში, ლოიალტე, Social Lab, DataMind, IBCCS Tax საქართველო

ხოლო პარტნიორია: EPAM, SmartCLM

მხარდამჭერები: ტერმინალი, IMPEL, Techweiz

ქომუნითი პარტნიორები: GAIA

მედიაპარტნიორები: ბიზნეს მედია საქართველო, On.ge, NEXT.On.ge, ფორმულა, ბიზნეს ფორმულა, ინტერპრესნიუსი, ბიზნესპრესნიუსი, მარკეტერი, AT.ge, Georgia Today, Ainews.ge

ბილეთები და დამატებითი ინფორმაცია: https://www.datafest.ge/