მეგან მარკლის 82 წლის მამის, თომას მარკლის წინააღმდეგ ბავშვებზე სექსუალური ძალადობის ამსახველი მასალების შესაძლო ფლობასთან დაკავშირებით გამოძიება მიმდინარეობს.

ბრიტანული მედიის ინფორმაციით, მსგავსი ფოტოები და ვიდეოები ფილიპინებში, თომას მარკლის ყოფილ საცხოვრებელ სახლში აღმოაჩინეს. მასალები, სავარაუდოდ, მისმა ვაჟმა, თომას მარკლ უმცროსმა იპოვა და გამოძიების ფედერალურ ბიუროს (FBI) ივლისში შეატყობინა.

თომას მარკლი ბრალდებებს უარყოფს.

ლონდონის მეტროპოლიტენის პოლიციამ დაადასტურა, რომ ჯერ კიდევ 2019 წლის იანვარში მიიღო წერილი, რომელშიც მეგან მარკლის მამის შესახებ რამდენიმე ბრალდება იყო გამოთქმული. თუმცა, პოლიციამ ინფორმაცია სხვა სამართალდამცავ უწყებებს არ გადასცა და მხოლოდ სასექსის ჰერცოგისა და ჰერცოგინიის ოფისს აცნობა.

ამჟამად ბრიტანეთის პოლიცია სწავლობს, რამდენად სწორად იმოქმედა 2019 წელს და ხომ არ არის საჭირო საქმის პოლიციის საქმიანობაზე ზედამხედველ ორგანოში გადაგზავნა.

მეგან მარკლის განცხადებით, მამის შესახებ შემაშფოთებელი ინფორმაცია ჯერ კიდევ 2018 წელს მიიღო. მისივე თქმით, სწორედ ეს გარემოებები ხსნის, რატომ გაწყვიტა მამასთან ურთიერთობა და რატომ არ აძლევდა მას შვილებთან კონტაქტის უფლებას.

საქმეს ფილიპინების სამართალდამცავი ორგანოებიც იძიებენ. ქვეყნის შინაგან საქმეთა მინისტრის განცხადებით, პოლიციამ თომას მარკლის კომპიუტერი ამოიღო და ციფრულ ექსპერტიზას ჩაუტარებს.

მეგან მარკლსა და მამამისს ურთიერთობა 2018 წელს, პრინც ჰარისთან მისი ქორწილის პერიოდში დაეძაბათ. მას შემდეგ ისინი ერთმანეთთან აღარ ურთიერთობენ.