ალბანეთში ანტისამთავრობო საპროტესტო აქციები მასშტაბურ არეულობაში გადაიზარდა. დემონსტრაციები 13 ოქტომბერს სტუდენტების პროტესტით გამწვავდა და დედაქალაქ ტირანიდან ქვეყნის სხვა ქალაქებშიც გავრცელდა.
მოქალაქეები განათლების გაძვირებას, ცხოვრების მაღალ ხარჯებსა და ხელისუფლებაში სავარაუდო კორუფციას აპროტესტებენ. მათი ნაწილი პრემიერ-მინისტრ ედი რამას გადადგომას მოითხოვს.
აქციების დროს დემონსტრანტების ნაწილი პოლიციას დაუპირისპირდა, დააზიანა სამთავრობო შენობები და კერძო ობიექტები. სამართალდამცველებმა ცრემლსადენი გაზი და წყლის ჭავლი გამოიყენეს.
18 ოქტომბრის მონაცემებით, დაკავებულია 167 ადამიანი, დაშავებულია 132 პოლიციელი. ხელისუფლებამ გადაჭარბებული ძალის გამოყენების შესაძლო შემთხვევების გამო შვიდ პოლიციელს უფლებამოსილება შეუჩერა.
პრემიერი გადადგომაზე უარს აცხადებს და ძალადობის წახალისებაში ოპოზიციას ადანაშაულებს.
პროტესტის მონაწილეთა უკმაყოფილება უკავშირდება ადრიატიკის სანაპიროზე დაგეგმილ ტურისტულ პროექტსაც, რომელიც დონალდ ტრამპის სიძის, ჯარედ კუშნერის ინვესტიციას უკავშირდება.
