აშშ-ის კალიფორნიის შტატში ტყის ხანძრების გამო მოსახლეობის ევაკუაცია მიმდინარეობს. შტატის მასშტაბით ერთდროულად 10 ხანძრის კერაა დაფიქსირებული.

ლოს-ანჯელესის სამხრეთით, ორინჯის ოლქში გაჩენილმა ხანძარმა დაახლოებით 2,3 კვადრატული კილომეტრი მოიცვა. დაზიანებული ან განადგურებულია სულ მცირე ექვსი საცხოვრებელი სახლი.

ხანძრები მძვინვარებს მალიბუსა და სან-დიეგოს ოლქებშიც. სან-დიეგოში ცეცხლი 12,5 კვადრატულ კილომეტრზე გავრცელდა, რის გამოც მნიშვნელოვანი ავტომაგისტრალის გადაკეტვა ორჯერ გახდა საჭირო.

ცეცხლის გავრცელებას ხელს უწყობს ძლიერი ქარი, დაბალი ტენიანობა და უჩვეულოდ მაღალი ტემპერატურა. სინოპტიკოსების პროგნოზით, სამხრეთ კალიფორნიაში ტემპერატურა 35 გრადუსს მიაღწევს.

ხანძართან ბრძოლისას ერთმა მეხანძრემ სიცხისგან ჯანმრთელობის დაზიანება მიიღო.