ევროპაში ცხოვრების გაძვირებისა და საბინაო კრიზისის წინააღმდეგ საპროტესტო აქციები ფართოვდება. საფრანგეთისა და ესპანეთის შემდეგ მასშტაბური დემონსტრაციები იტალიასა და პორტუგალიაშიც გაიმართა.
17 ოქტომბერს მილანში მშვიდობიანი მსვლელობა პოლიციასთან შეტაკებებში გადაიზარდა. დემონსტრანტების ნაწილმა სამართალდამცველებს ქვები ესროლა და ბარიკადებს ცეცხლი წაუკიდა. პოლიციამ ცრემლსადენი გაზი და წყლის ჭავლი გამოიყენა. დაშავდა ორი პოლიციელი, დააკავეს დაახლოებით 50 ადამიანი.
პორტუგალიის დედაქალაქ ლისაბონში კი მოქალაქეებმა საცხოვრებლის გაძვირება, დაბალი ხელფასები და სოციალური უთანასწორობა გააპროტესტეს. აქციის მონაწილეებმა ქალაქის ცენტრალურ მოედანზე კარვები გაშალეს.
ოფიციალური მონაცემებით, პორტუგალიაში 2015-2024 წლებში საცხოვრებელი უძრავი ქონების ფასები 124%-ით გაიზარდა, რაც ევროკავშირის საშუალო მაჩვენებელზე დაახლოებით ორჯერ მეტია.
მსგავსი საპროტესტო გამოსვლები ბოლო კვირებში ესპანეთში, საფრანგეთსა და ალბანეთშიც გაიმართა. დემონსტრანტები ხელისუფლებებისგან ცხოვრების ხარჯების შემცირებას, ხელმისაწვდომ საცხოვრებელსა და საჯარო მომსახურების გაუმჯობესებას მოითხოვენ.
