უკრაინის პრეზიდენტი ვოლოდიმირ ზელენსკი ხარკოვის ოლქში რუსეთის მიერ განხორციელებულ თავდასხმას ეხმაურება, რომელსაც ექვსი ადამიანის, მათ შორის ბავშვების სიცოცხლე ემსხვერპლა.
როგორც ზელენსკი სოციალურ ქსელ X-ზე წერს, რუსულმა ძალებმა „შაჰედის“ ტიპის უპილოტო საფრენი აპარატით ხარკოვის ოლქში მდებარე პარკს დაარტყეს, სადაც მშვიდობიანი მოქალაქეები იმყოფებოდნენ.
უკრაინის პრეზიდენტის ინფორმაციით, თავდასხმის შედეგად ექვსი ადამიანი დაიღუპა. დაღუპულებს შორის არის ერთ წელზე ოდნავ უფროსი გოგონა, ანგელინა, რომელიც თავდასხმის დროს საბავშვო ეტლში იმყოფებოდა. მისი დედა, ინა, მიღებული დაზიანებების შედეგად საავადმყოფოში გარდაიცვალა. დაღუპულია კიდევ ერთი, 11 წლის გოგონა.
რუსული თავდასხმის შედეგად დაშავდა 14 ადამიანი, მათ შორის ექვსი ბავშვი.
ზელენსკიმ მადლობა გადაუხადა საერთაშორისო პარტნიორებს, რომლებიც უკრაინას თავდაცვის შესაძლებლობების გაძლიერებასა და რუსული რაკეტებისა და დრონების განეიტრალებაში ეხმარებიან.
უკრაინის პრეზიდენტმა კიდევ ერთხელ გაუსვა ხაზი საჰაერო თავდაცვის სისტემების აუცილებლობას და საერთაშორისო საზოგადოებას რუსეთის წინააღმდეგ სანქციების შენარჩუნებისკენ მოუწოდა.
მისი განცხადებით, დაუშვებელია რუსეთთან ეკონომიკური თანამშრომლობისა და ფინანსური სარგებლის მიღების შესაძლებლობების განხილვა მაშინ, როდესაც მოსკოვი ომსა და მშვიდობიანი მოქალაქეების მკვლელობას აგრძელებს.
ზელენსკიმ შეერთებულ შტატებს მოუწოდა, აამოქმედოს ე.წ. „ლინდსი გრემის კანონი“, რომელიც რუსეთის წინააღმდეგ სანქციებს უკავშირდება. ამასთან, მან ევროპელ პარტნიორებს უკრაინის მხარდაჭერის გაგრძელება სთხოვა.
უკრაინის პრეზიდენტის განცხადებით, მისი ქვეყანა მშვიდობის მიღწევას ცდილობს, თუმცა რუსეთი თავდასხმებსა და ადამიანების მკვლელობას არ წყვეტს.
ზელენსკის შეფასებით, საერთაშორისო საზოგადოებას ომის შესაჩერებლად საკმარისი რესურსი და გავლენა აქვს, თუმცა აუცილებელია ამ შესაძლებლობების ეფექტიანად გამოყენება.
„ფოტოები საშინელია, თუმცა მათ მიღმა განადგურებული ცხოვრება და ამ ომის სიმართლეა. ადამიანების სიცოცხლე უნდა დავიცვათ. უკრაინას საჰაერო თავდაცვა სჭირდება“, - აცხადებს უკრაინის პრეზიდენტი.
მისივე თქმით, რუსეთის წინააღმდეგ დაწესებული სანქციები ძალაში უნდა დარჩეს მანამდე, სანამ ადამიანების მკვლელობა გრძელდება.
„მსოფლიოს ომის შესაჩერებლად საკმარისი ძალა აქვს. ეს ძალა მკვლელების წინააღმდეგ საბოლოოდ უნდა იქნას გამოყენებული“, - წერს ზელენსკი.
