ალბანეთში მასშტაბური საპროტესტო გამოსვლები მეექვსე დღეა არ წყდება. დემონსტრაციებს პოლიციასთან დაპირისპირება, ძალადობრივი ინციდენტები და ხანძრები ახლავს. ქვეყნის პრემიერ-მინისტრი ედი რამა აცხადებს, რომ საპროტესტო მოძრაობის გააქტიურების უკან შესაძლოა რუსეთი და ირანი იდგნენ, თუმცა ხელისუფლებას ამ ბრალდებების დამადასტურებელი მტკიცებულებები ჯერჯერობით არ წარმოუდგენია.

რამას განცხადებით, სოციალურ ქსელებში ათიათასობით ყალბი ანგარიში შეიქმნა, რომელთა მეშვეობითაც მომხმარებლები თავს გარემოს დაცვით დაინტერესებულ ალბანელებად ასაღებდნენ. პრემიერის მტკიცებით, ამ პროცესში ირანიც მონაწილეობდა და ათასობით ადამიანის მობილიზაციას უწყობდა ხელს. ედი რამა დარწმუნებულია, რომ ეს მოვლენები შემთხვევითი არ არის.

საპროტესტო მოძრაობა, სახელწოდებით „ფლამინგოს რევოლუცია“, ალბანეთში მაისში დაიწყო. უკმაყოფილების თავდაპირველი მიზეზი ქვეყნის სამხრეთ სანაპიროზე, დაცულ ტერიტორიაზე, ფეშენებელური ტურისტული კომპლექსის მშენებლობის გეგმა გახდა. პროექტის მხარდამჭერ ინვესტორებს შორის აშშ-ის პრეზიდენტ დონალდ ტრამპის სიძე, ჯარედ კუშნერიც არის.

ივლისში Reuters-თან საუბრისას ადგილობრივი მცხოვრებლები აცხადებდნენ, რომ მათი მიწები უკანონოდ გასხვისდა. მოგვიანებით სააგენტომ გაავრცელა ინფორმაცია, რომ მიწის გამყიდველ პირს პროკურატურა ნარკოტიკებით ვაჭრობაში შესაძლო მონაწილეობის გამო ეძებდა. აღნიშნული ბრალდებები მისი ადვოკატის მხრიდან უარყოფილი იყო.

დროთა განმავლობაში გარემოსდაცვითი პროტესტი უფრო ფართო ანტისამთავრობო მოძრაობაში გადაიზარდა. დემონსტრანტებმა ხელისუფლების კორუფციული პოლიტიკის, ეკონომიკური უთანასწორობისა და ქვეყანაში არსებული სოციალური პრობლემების გაპროტესტებაც დაიწყეს.

ოქტომბერში ვითარება განსაკუთრებით დაიძაბა, როდესაც საპროტესტო გამოსვლებს სტუდენტებიც შეუერთდნენ. მათი უკმაყოფილების მთავარი მიზეზები სწავლის მაღალი საფასური, უნივერსიტეტებში არსებული არასათანადო პირობები, კორუფცია და დასაქმების შეზღუდული შესაძლებლობები გახდა.

13 ოქტომბერს დემონსტრანტებსა და სამართალდამცველებს შორის პირველი შეტაკებები მოხდა. სწორედ ამის შემდეგ აქციის მონაწილეებმა მთავარ პოლიტიკურ მოთხოვნად პრემიერ-მინისტრ ედი რამას მთავრობის გადადგომა დაასახელეს.

თავად რამა თანამდებობის დატოვებას არ აპირებს. მისი შეფასებით, მიმდინარე არეულობა საფრთხეს უქმნის არა ხელისუფლების არსებობას, არამედ ალბანეთის ევროპულ მომავალს. აღსანიშნავია, რომ მონტენეგროსთან ერთად, ალბანეთი ბალკანეთის რეგიონში ევროკავშირში გაწევრიანების პროცესის ერთ-ერთ ლიდერად მიიჩნევა.

ამ დროისთვის ტირანასა და ქვეყნის სხვა ქალაქებში პოლიციასა და დემონსტრანტებს შორის დაპირისპირება ყოველდღიურ ხასიათს ატარებს. აქციის მონაწილეები სამართალდამცველების მიმართულებით ქვებს, ლითონის საგნებსა და აალებადი ნივთიერებით სავსე ბოთლებს ისვრიან. საპასუხოდ პოლიცია წყლის ჭავლსა და ცრემლმდენ გაზს იყენებს.

არეულობის შედეგად დაზიანებულია პარლამენტის, განათლებისა და იუსტიციის სამინისტროების, საკონსტიტუციო სასამართლოს, საბანკო დაწესებულებებისა და სხვადასხვა კომერციული ობიექტის შენობები. დაკავებულია ასობით დემონსტრანტი, დაშავებულ პოლიციელთა რაოდენობა კი 150-ს აჭარბებს.

ალბანეთის ხელისუფლება უკვე წლებია კორუფციული სკანდალების ფონზე საქმიანობს. ანალიტიკოსების ნაწილი ვარაუდობს, რომ ქვეყანა ნარკოტიკებისა და იარაღის უკანონო ვაჭრობით მიღებული შემოსავლების გათეთრებისთვის ხელსაყრელ გარემოს წარმოადგენს. მათი შეფასებით, მსგავსი პრობლემები დამატებით დაბრკოლებებს ქმნის ალბანეთის ევროკავშირში ინტეგრაციის გზაზე.