საფრანგეთში მასობრივი არეულობისა და მაღაზიების ძარცვის შემდეგ, მეორადი ნივთებით ვაჭრობის ონლაინპლატფორმა Vinted-მა სავარაუდოდ მოპარული პროდუქციის გაყიდვის შესახებ განცხადებების წაშლა დაიწყო.

კომპანიის განცხადებით, შაბათ-კვირას მომხდარი არეულობის შემდეგ დაუყოვნებლივ ამოქმედდა სპეციალური ზომები იმ განცხადებების გამოსავლენად და წასაშლელად, რომლებიც მაღაზიების ძარცვას შესაძლოა უკავშირდებოდეს.

საფრანგეთის რამდენიმე ქალაქში საპროტესტო გამოსვლები მასობრივ არეულობასა და ძალადობაში გადაიზარდა. დემონსტრანტების ნაწილმა მაღაზიები დაარბია და საქონელი გაიტაცა.

პარიზში, მარსელში, ლილსა და სხვა ქალაქებში ძარცვის არაერთი შემთხვევა დაფიქსირდა. თავდაპირველად საპროტესტო აქციები ცხოვრების გაძვირებისა და სახელმწიფო ხარჯების წინააღმდეგ დაიწყო, მოგვიანებით კი ძალადობრივ დაპირისპირებაში გადაიზარდა. სამართალდამცველებმა სულ მცირე 1 200 ადამიანი დააკავეს.

საფრანგეთის სავაჭრო-სამრეწველო პალატების (CCI) ხელმძღვანელის, ალენ დი კრეშენცოს ინფორმაციით, შაბათ-კვირის არეულობის შედეგად 2 000-ზე მეტი ბიზნესი დაზარალდა. როგორც მან ტელეკომპანია RTL-ს განუცხადა, მიყენებული ზარალი ასობით მილიონ ევროს აღწევს.

გავრცელებულ კადრებში ჩანს, როგორ უკიდებენ ცეცხლს ავტომობილებსა და შენობებს ნიღბიანი პირები და როგორ არბევენ სავაჭრო ობიექტებს.

როგორც ჩანს, მოპარული ნივთების ნაწილი უკვე ონლაინგასაყიდ პლატფორმებზე მოხვდა.

Vinted-ში აცხადებენ, რომ მოპარული ნივთებით ვაჭრობის მიმართ ნულოვანი ტოლერანტობის პოლიტიკა აქვთ.

„მოპარული საქონლის გაყიდვა ან მისი შეძენის მოთხოვნით განცხადებების განთავსება ჩვენს პლატფორმაზე კატეგორიულად აკრძალულია“, - განაცხადა კომპანიის წარმომადგენელმა.

Vinted-ის განმარტებით, გაძლიერებულია საეჭვო განცხადებების მონიტორინგი, ხოლო წესების დარღვევის შემთხვევაში მომხმარებლების ანგარიშების წინააღმდეგ შესაბამის ზომებს იღებენ, მათ შორის, შესაძლებელია მათი სამუდამოდ დაბლოკვაც.

კომპანია საფრანგეთის პოლიციასა და შესაბამის სახელმწიფო უწყებებთან თანამშრომლობს. ამასთან, იხვეწება საეჭვო საქმიანობის გამოვლენისა და აღკვეთის მექანიზმები.

საფრანგეთში განვითარებულ მოვლენებს გამოეხმაურა ონლაინვაჭრობის კიდევ ერთი მსხვილი პლატფორმა eBay. კომპანიის ინფორმაციით, არეულობასთან დაკავშირებული საეჭვო განცხადებების რაოდენობის ზრდა არ დაფიქსირებულა. თუმცა eBay სამართალდამცველებთან თანამშრომლობს და, თუ დადასტურდება, რომ გასაყიდად გამოტანილი ნივთი მოპარულია, განცხადებას შლის და გამყიდველის წინააღმდეგ შესაბამის ზომებს იღებს.

არეულობამ მნიშვნელოვანი ზიანი მიაყენა საფრანგეთის ძვირადღირებულ სავაჭრო ობიექტებსაც.

Reuters-ის ცნობით, პარიზის პრესტიჟულ ვანდომის მოედანზე მდებარე ფუფუნების საგნებით მოვაჭრე მაღაზიები დროებით დაიხურა და მათ ტერიტორიაზე დაცვა გაძლიერდა.

საფრანგეთის დედაქალაქში დაზიანდა ისეთი ცნობილი ბრენდების მაღაზიების ვიტრინები, როგორებიცაა Dior, Rolex, Louis Vuitton და Ralph Lauren.

ძარცვის შემთხვევები დაფიქსირდა სპორტულ მაღაზიებშიც. საფეხბურთო კლუბ „მარსელის“ ინფორმაციით, ქალაქის ისტორიულ მთავარ გამზირზე მდებარე მისი ოფიციალური მაღაზია გაძარცვეს, რის გამოც ობიექტი დროებით დაიხურა.

უსაფრთხოების მიზეზით საკუთარი საფირმო მაღაზიის მუშაობა შეაჩერა საფეხბურთო კლუბმა „ლილმაც“. კლუბის განცხადებით, მაღაზია დამატებით შეტყობინებამდე დაკეტილი დარჩება.