პან-ამერიკული ჯანმრთელობის ორგანიზაციამ შეერთებულ შტატებს წაუხსნა წითელას ელიმინაციის სტატუსი, რითაც დასრულდა 26-წლიანი პერიოდი. როგორც „უოლ სტრიტ ჯორნალი“ წერს, ორგანიზაციამ დაადგინა, რომ ქვეყანაში ვირუსის უწყვეტი გავრცელება ერთი წელზე მეტხანს ვერ შეაჩერეს. გამოცემა წყაროებზე დაყრდნობით იუწყება, რომ პროცესთან დაახლოებულმა პირმა CNN-ს განუცხადა: დამოუკიდებელმა ექსპერტთა კომისიამ, რომელიც PAHO-ს დირექტორს ექვემდებარება, დაასკვნა, რომ აშშ ამ სტატუსის შენარჩუნებას ვეღარ ახერხებს.
რა ვიცით ამ ეტაპზე?
PAHO-მ განიხილა დაავადებათა კონტროლისა და პრევენციის ცენტრის (CDC) მტკიცებულებები იმის დასადგენად, იყო თუ არა ერთი და იგივე შტამი ქვეყანაში უწყვეტად გავრცელებული 12 თვეზე მეტხანს — რაც ადგილობრივი გავრცელების ნიშანია და არა იმპორტირებული შემთხვევების. Reuters-ის ინფორმაციით, CDC-მ დაადგინა, რომ ქვეყანაში წითელას უწყვეტი გადაცემა 12 თვის განმავლობაში მიმდინარეობდა.
აშშ წითელას ელიმინაციის სტატუსს 2000 წლიდან ფლობდა. თუმცა, წელს CDC-ის მონაცემებით, ხუთშაბათის მდგომარეობით, 5 182 დადასტურებული შემთხვევაა დაფიქსირებული — 45 შტატში, ნიუ-იორკსა და ვაშინგტონში. ეს მაჩვენებელი ორჯერ აღემატება 2025 წლის მთლიან მონაცემს, როდესაც 2 289 შემთხვევა იყო.
2025 წლიდან დღემდე დაახლოებით 7 500 ადამიანი დაინფიცირდა და 13 გარდაიცვალა. CNN-ის ცნობით, თითქმის ყველა წლევანდელი შემთხვევა უკავშირდება აუცრელ ან უცნობი სტატუსის მქონე პირებს, ხოლო დაახლოებით ყოველი მეცხრე პაციენტი ჰოსპიტალიზებული იყო.
ამ პერიოდში შეერთებულ შტატებში გაიზარდა ვაქცინაციისადმი სკეპტიციზმი, რაც ჯანდაცვის მდივან რობერტ ფ. კენედი უმცროსის ხელმძღვანელობის პერიოდს დაემთხვა. კენედი წლების განმავლობაში გამოთქვამდა ეჭვებს წითელას ვაქცინის უსაფრთხოებაზე, თუმცა ამის სამეცნიერო მტკიცებულება არ არსებობს.
შეიძლება თუ არა წითელას პრევენცია?
ექსპერტები ხაზს უსვამენ, რომ წითელა ვაქცინაციით სრულად პრევენცირებადია.
„ეს დაავადება სრულად პრევენცირებადია. დაუშვებელია, რომ ამდენი წითელას შემთხვევა გვქონდეს,“ — განაცხადა ჩრდილოეთ კაროლინის უნივერსიტეტის საზოგადოებრივი ჯანმრთელობის პროფესორმა ნოელ ბრიუერმა, რომელიც წითელას საკითხებზე დამოუკიდებელ საკონსულტაციო პანელს ხელმძღვანელობს. მან სამშაბათს CDC-ის ანგარიში PAHO-ს წარუდგინა, იტყობინება Reuters.
ჯონს ჰოპკინსის ეპიდემიოლოგმა უილიამ მოსმა Reuters-ს განუცხადა, რომ სტატუსის დაკარგვა აზიანებს ამერიკის რეპუტაციას, როგორც საზოგადოებრივი ჯანმრთელობის ლიდერისას, და ნიშნავს, რომ მასშტაბური აფეთქებები გაგრძელდება.
CDC-ის დირექტორმა ერიკა შვარცმა გადაწყვეტილებამდე განაცხადა, რომ სააგენტო შტატებთან ერთად ვაქცინაციის წახალისებაზე მუშაობას გააგრძელებს.
სტატუსის დასაბრუნებლად, ქვეყანამ უნდა შეწყვიტოს ვირუსის გადაცემა და მინიმუმ 12 თვის განმავლობაში არ ჰქონდეს აფეთქებები.
