აშშ-ის ადმინისტრაციის ერთ-ერთმა წარმომადგენელმა „ამერიკის ხმას“ განუცხადა, რომ მიუხედავად იმისა, თუ რა სახის დახმარებას უწევენ ირანს სხვა ქვეყნები, ეს დახმარება არაეფექტური აღმოჩნდა აშშ-ის სამხედრო ოპერაციისა და მიმდინარე დამანგრეველი ეკონომიკური ზეწოლის ფონზე, რომელიც წელს ირანის რეჟიმის წინააღმდეგ განხორციელდა.
ამ განცხადებით ოფიციალური პირი გამოეხმაურა „ფაინენშალ თაიმსის“ მიერ ხუთშაბათს გამოქვეყნებულ მასალას, სადაც ნათქვამი იყო, რომ რუსეთი ირანში 90 ერთეულ ვერტმფრენზე დამონტაჟებულ სარაკეტო გამშვებ სისტემას გეგმავდა ექსპორტზე.
„ფაინენშალ თაიმსი“ ეყრდნობოდა რუსეთის თავდაცვის დოკუმენტებს, სადაც მითითებული იყო სავარაუდო წარმოების გრაფიკი 2024 და 2025 წლებისთვის. მასალაში არ იყო დაკონკრეტებული, მიეწოდა თუ არა ეს სამხედრო დახმარება ირანს. რუსეთმა ხუთშაბათის ანგარიშზე დაუყოვნებლივ არ უპასუხა.
ანგარიშის გამოქვეყნება დაემთხვა ირანის ეროვნული უშიშროების საბჭოს წარმომადგენლის, მოჰსენ რეზაის ვიზიტს მოსკოვში, სადაც მან ხუთშაბათს რუსეთის პრეზიდენტ ვლადიმირ პუტინს შეხვდა.
„ირანი სამხედრო თვალსაზრისით სრულად განადგურდა ოპერაცია „ეპიკური რისხვის“ შედეგად, ახლა კი რეჟიმი ეკონომიკურად იხრჩობა ოპერაცია „ეკონომიკური რისხვისა“ და ისტორიაში ერთ-ერთი ყველაზე წარმატებული ბლოკადის ფონზე,“ – განაცხადა ოფიციალურმა პირმა „ამერიკის ხმასთან“ ელფოსტით, ანონიმურობის დაცვით.
„სხვა არცერთი ქვეყნის მიერ მიწოდებული დახმარება ირანს არ ეხმარება.“
ოფიციალურმა პირმა არ დააკონკრეტა, იღებს თუ არა ირანი დახმარებას სხვა ქვეყნებიდან.
წელს უფრო ადრე, მედიაში გავრცელდა ცნობები, რომ რუსეთმა ირანს მიაწოდა ინფორმაცია ახლო აღმოსავლეთში მდებარე აშშ-ის სამხედრო ბაზების შესახებ.
ამავდროულად, რამდენიმე ამერიკულმა მედიასაშუალებამ გამოაქვეყნა მასალები, სადაც ჩინეთი ირანისთვის სამხედრო დახმარების, მათ შორის სატელიტური სურათების მიწოდებაში დაადანაშაულეს, რათა ირანს აშშ-ის ბაზების დამიზნება შეძლებოდა. ორივე ქვეყანამ ეს ბრალდებები უარყო.
აშშ-ის პრეზიდენტმა დონალდ ტრამპმა 24 ივლისს განაცხადა, რომ მისმა ჩინელმა და რუსმა კოლეგებმა, სი ძინპინმა და ვლადიმირ პუტინმა, პირობა დადეს, რომ ირანისთვის იარაღს არ გაყიდიან. ტრამპმა მაშინ გააფრთხილა, რომ „ეს მათთვის ძალიან ცუდი იქნება“, თუ სამხედრო ტექნიკას ირანის რეჟიმს მიჰყიდიან.
