აუქციონის სახლი Sotheby's აცხადებს, რომ მუშაობს დავის მოგვარებაზე, რომელიც უკავშირდება ვინსენტ ვან გოგის ნახატის გაყიდვას.

Châtaigniers en Fleurs, რომლის სავარაუდო ღირებულება 180 მილიონ დოლარს (136 მილიონ ფუნტს) შეადგენს, ნიუ-იორკში აუქციონზე ოთხშაბათს უნდა გავიდეს.

თუმცა, ფიშერების ოჯახის მემკვიდრეების წარმომადგენლები – რომლებიც ნახატის ადრინდელი გერმანელი მფლობელები იყვნენ – აცხადებენ, რომ ეს ნამუშევარი შესაძლოა იძულებით გაყიდეს ნაცისტების აღზევების პერიოდში.

Sotheby's-ის განცხადებით, მათმა „ფართომასშტაბიანმა კვლევამ“ ეს ფაქტი არ დაადასტურა, თუმცა აუქციონის სახლი მზად არის ოჯახთან ერთად იმუშაოს და გამოსავალი იპოვოს.

„Sotheby's ძალიან სერიოზულად ეკიდება წარმომავლობისა და რესტიტუციის საკითხებს და ჩაატარა ფართო კვლევა Châtaigniers en fleurs-ის მფლობელობის ისტორიაზე,“ – ნათქვამია Sotheby's-ის განცხადებაში, რომელიც BBC-ს მიაწოდეს.

„ჩვენ ვიცით იმ შეშფოთების შესახებ, რომელიც ფიშერების მემკვიდრეების წარმომადგენლებმა ბოლო დროს გამოთქვეს და მათთან დიალოგში ვართ ნახატის ისტორიასთან დაკავშირებით.

მიუხედავად იმისა, რომ ჩვენი დღევანდელი კვლევით არ დადასტურებულა, რომ ნახატი იძულებით გაიყიდა, ჩვენ ვაცნობიერებთ, რამდენად მნიშვნელოვანია ოჯახთან გააზრებული და კონსტრუქციული თანამშრომლობა და მზად ვართ, მივაღწიოთ ორმხრივად მისაღებ გადაწყვეტას.“

ნახატი, რომლის სახელიც ქართულად ითარგმნება როგორც „აყვავებული წაბლის ხეები“, იყიდება Blaquier-Arrieta-ს კოლექციის ფარგლებში.

Sotheby's-ის ვებგვერდზე დეტალურადაა აღწერილი ზეთის ნახატის წარმომავლობა და ის, თუ როგორ გამოიკვლიეს ნამუშევრის მფლობელების ცვლილებები 1890 წლიდან დღემდე.

მათივე ცნობით, სამუელ ფიშერმა – ცნობილმა გერმანელმა გამომცემელმა – ნახატი 1909 წელს შეიძინა, ხოლო მისი გარდაცვალების შემდეგ, 1934 წელს, ნამუშევარი ოჯახში გადაეცა.

Sotheby's-ის ინფორმაციით, ნახატი 1932 ან 1933 წელს ამსტერდამში პოლ კასირერთან იყო შენახული, შემდეგ კი 1936 წელს პარიზში ანრიეტა და მარსელ კაპფერერებს გადაეცათ.

მას შემდეგ, სანამ წელს აუქციონზე გაიტანდნენ, ნახატს კიდევ ოთხი მფლობელი ჰყავდა.

ფიშერების ოჯახის მემკვიდრეებმა დაიქირავეს ადვოკატი, რომელმაც, New York Times-ის ცნობით, Sotheby's-ს წერილობით მიმართა.

როგორც იუწყებიან, მან აუქციონის სახლს აცნობა, რომ ნახატი ამსტერდამში მეორე მსოფლიო ომამდე გაიყიდა, რადგან ფიშერების ოჯახის გამომცემლობას ნაცისტების პერიოდში ფინანსური ზარალი მიადგა.

BBC-მ კომენტარისთვის ადვოკატს მიმართა.